На калегіі пракуратуры Мінскай вобласці з удзелам намесніка Генпракурора Аляксандра Лашына падведзены вынікі працы за 2019 год

Пад старшынствам пракурора Мінскай вобласці Сяргея Хмарука з удзелам пракурораў раёнаў і г.Жодзіна, Мінскага транспартнага пракурора, кіраўнікоў структурных падраздзяленняў апарата абласной пракуратуры, іншых пракурорскіх работнікаў адбылася калегія па выніках працы пракуратуры вобласці за 2019 год. 

У мерапрыемстве прыняў удзел намеснік Генеральнага пракурора Рэспублікі Беларусь Аляксандр Лашын. 

У сваім выступе Сяргей Хмарук адзначыў, што праца пракуратуры ва ўзаемадзеянні з выканаўчымі і распарадчымі, праваахоўнымі і кантралюючымі органамі дала магчымасць забяспечыць у рэгіёне парадак, замацаваць станоўчыя тэндэнцыі ў дынаміцы і структуры злачыннасці, павысіць эфектыўнасць нагляду, у тым ліку яго праваабарончы складальнік.

Итоговая коллегия 2.jpg

У 2019 годзе знізіўся ўзровень злачыннасці на 10 тысяч насельніцтва – з 111,6 да 109,5. На 5,2 % менш зарэгістравана выпадкаў гібелі людзей ад знешніх прычын. 

Комплекс прафілактычных мер спрыяў скарачэнню колькасці злачынстваў у сельскай мясцовасці, сярод раней судзімых, у сферы сямейна-бытавых адносін. Менш стала забойстваў, згвалтаванняў, разбояў, фактаў незаконнага абароту наркотыкаў. У войсках, якія дыслацыруюцца на тэрыторыі вобласці, больш чым у 2 разы знізілася колькасць злачынстваў. 

Разам з тым больш здзейснена крымінальна каральных дзеянняў непаўналетнімі (15 %), у стане ап'янення (+ 8,3 %), у групе асоб (+ 3 %), у грамадскіх месцах (+ 2 %). 

Зафіксаваны рост пажараў з гібеллю людзей у Лагойскім, Капыльскім і Стаўбцоўскім раёнах. У такіх выпадках больш за ўсіх рызыкуюць жыццём сацыяльна-ўразлівыя катэгорыі грамадзян. 

Адной з прычын негатыўнай дынамікі крымінагеннай абстаноўкі выступае недастатковая прафілактычная роля грамадскіх фарміраванняў. 

Застаецца высокім узровень карупцыйных злачынстваў у дзяржаўным кіраванні, прамысловасці, АПК. Надзвычай уразлівая сфера закупак, у якой карупцыйныя праявы атрымалі вельмі распаўсюджаны характар. 

«Галоўная задача – не дапусціць і папярэдзіць злачынствы супраць інтарэсаў службы. Пракуроры павінны праводзіць мэтанакіраваную працу па выяўленні прычын і ўмоў, якія спрыяюць карупцыі», – падкрэсліў пракурор Мінскай вобласці Сяргей Хмарук. 

Ён запатрабаваў ад тэрытарыяльных пракурораў надаваць асаблівую ўвагу каардынацыі работы праваахоўнага блока, паляпшэнню ўзаемадзеяння з кантралюючымі і мясцовымі органамі ўлады, прынцыпова рэагаваць на выяўленыя парушэнні. 

У рамках нагляду за выкананнем заканадаўства і законнасцю прававых актаў у 2019 годзе пракуроры забяспечылі пакрыццё шкоды ад супрацьпраўных дзеянняў у памеры больш за 750 тыс. рублёў, а таксама вяртанне замежнымі контрагентамі ў адрас суб'ектаў гаспадарання Беларусі звыш 5 млн расійскіх рублёў і 740 тыс. долараў ЗША. 

«Для органаў пракуратуры вобласці застаецца першарадным нагляд за выкананнем заканадаўства пры экспартных пастаўках тавараў. Задачы ранейшыя – своечасовае паступленне выручкі ад знешнегандлёвых аперацый і спагнанне знешняй пратэрмінаванай дэбіторскай запазычанасці», – сказаў пракурор вобласці. 

У сувязі з гэтым Сяргей Хмарук арыентаваў калег на рэгулярны аналіз інфармацыі аб дзейнасці тавараправодных сетак дзяржаўных (з доляй уласнасці дзяржавы) прадпрыемстваў-экспарцёраў, прыняцце ў выпадку неабходнасці мер да абароны маёмасных інтарэсаў дзяржавы і прыцягненне вінаватых да адказнасці. 

Итоговая коллегия 3.jpg
З 9 437 зваротаў грамадзян і юрыдычных асоб, якія паступілі у 2019 годзе ў органы пракуратуры Мінскай вобласці, дазволена 5 814, з іх задаволена 1 749. 

Прыярытэтнымі напрамкамі нагляднай працы ў 2020 годзе названы: 

• прафілактыка злачынстваў/правапарушэнняў; 

• законнасць у сферы бяспекі жыццядзейнасці, выкананна працоўных і іншых сацыяльных правоў грамадзян, інвестыцыйнай дзейнасці, выканаўчага вядзення; 

• захаванасць дзяржаўнай уласнасці, у тым ліку ў аграпрамысловым сектары; 

• актывізацыя працы з насельніцтвам, грамадскімі фарміраваннямі. 

Намеснік Генеральнага пракурора Рэспублікі Беларусь Аляксандр Лашын ў сваім выступе зазначыў важнасць забеспячэння ў 2020 годзе эфектыўнага нагляду ў інвестыцыйнай дзейнасці і супрацьдзеянні карупцыі. 

«Прашу ўзяць на асаблівы ўлік крымінальныя справы аб злачынствах супраць інтарэсаў службы і кантраляваць спагнанне атрыманых злачынным шляхам даходаў. Пры гэтым патрабую прынцыпова падыходзіць да высвятлення прычын шматлікіх і паўторных парушэнняў антыкарупцыйных нормаў», – сказаў Аляксандр Лашын. 

Па выніках пасяджэння калегія пракуратуры вобласці вызначыла новыя задачы і мерапрыемствы на 2020 год, прыняла рашэнне, мэта якога – умацаванне законнасці і правапарадку, барацьба з карупцыяй, абарона праў і законных інтарэсаў грамадзян і дзяржавы. 

Фота: пракуратура Мінскай вобласці 

Служба інфармацыі
пракуратуры Мінскай вобласці


Іншыя навіны


Асноўныя падзеі

Последние новости