Новая архітэктура эканомікі, умацаванне фінансавага суверэнітэту і міжнароднага партнёрства: Генеральны пракурор Рэспублікі Беларусь Андрэй Швед прыняў удзел у XXVIII Пецярбургскім міжнародным эканамічным форуме

Дэлегацыя Генеральнай пракуратуры Рэспублікі Беларусь на чале з Генеральным пракурорам Рэспублікі Беларусь Андрэем Шведам прыняла ўдзел у рабоце XXVIII Пецярбургскага міжнароднага эканамічнага форуму, арганізаванага ў г.Санкт-Пецярбургу 19 –20 чэрвеня 2025 г.

Даведачна. Пецярбургскі міжнародны эканамічны форум – адна з самых буйных і аўтарытэтных міжнародных пляцовак, на якой прадстаўнікі дзяржаў, бізнесу, навукі і міжнародных арганізацый абмяркоўваюць глабальныя эканамічныя тэндэнцыі, інвестыцыйнае ўзаемадзеянне і стратэгічныя выклікі сучаснасці.

Дэлегацыя Генеральнай пракуратуры прыняла ўдзел у шэрагу ключавых мерапрыемстваў, у тым ліку пленарнае пасяджэнне форуму, дзе абмяркоўваліся перспектывы фарміравання новай архітэктуры эканомікі, умацавання фінансавага суверэнітэту і міжнароднага партнёрства.

Асаблівае значэнне меў удзел Генеральнага пракурора Рэспублікі Беларусь у рабоце дыскусійнай сесіі, арганізаванай Генеральнай пракуратурай Расійскай Федэрацыі, – яна была прысвечана зніжэнню рэгулятарнай і адміністрацыйнай нагрузкі як умове свабоды прадпрымальніцтва, прыцягнення інвестыцый і ўзаемавыгаднага супрацоўніцтва.

У сваім дакладзе Андрэй Швед прадставіў беларускі вопыт прававога суправаджэння прадпрымальніцтва, падкрэсліўшы, што ў краіне праводзіцца паслядоўная палітыка па стварэнню спрыяльнага дзелавога асяроддзя. «Генеральная пракуратура актыўна ўдзельнічае ў гэтай працы. У прыватнасці, па даручэнні Прэзідэнта Рэспублікі Беларусь дапрацаваны Указ аб кантрольна-нагляднай дзейнасці, накіраваны на цыфравізацыю праверачных працэдур, зніжэнне бюракратычнай нагрузкі і ўмацаванне прэвентыўнага падыходу», – канстатаваў ён.

Андрэй Швед звярнуў увагу на тое, што ў краіне паспяхова спалучаюцца інтарэсы дзяржавы і бізнесу. «Пры гэтым пракурорскі нагляд ахоплівае такія напрамкі, як процідзеянне карупцыі, кантроль за рэалізацыяй контрсанкцыйных мер, маніторынг цэнаўтварэння, абмежаванне мікрафінансавай дзейнасці і абарону правоў грамадзян у сферы лічбавых злачынстваў», – сказаў кіраўнік нагляднага ведамства Беларусі.

Выступленне Генеральнага пракурора выклікала цікавасць ва ўдзельнікаў і атрымала пазітыўны водгук з боку прафесійнай супольнасці - тэзісы аб збалансаваным падыходзе да рэгулявання бізнесу і недапушчальнасці адмовы дзяржавы ад сваіх базавых функцый падтрымалі прадстаўнікі розных краін.

У рабоце гэтай сесіі таксама прынялі ўдзел генеральныя пракуроры Анголы, Венесуэлы, Саудаўскай Аравіі, Кубы, Аб'яднаных Арабскіх Эміратаў і Турцыі.

Абмен меркаваннямі ў прадстаўнічай міжнароднай аўдыторыі дазволіў супаставіць падыходы да пытанняў прававога суправаджэння эканомікі і ўстанавіць новыя арыенціры для ўзаемадзеяння наглядных ведамстваў.

На пляцоўцы Форума ў гэты ж дзень адбылася рабочая сустрэча Генеральнага пракурора Рэспублікі Беларусь Андрэя Шведа з Генеральным пракурорам Расійскай Федэрацыі Ігарам Красновым.

У ходзе перагавораў кіраўнікі наглядных ведамстваў абмеркавалі прыярытэтныя напрамкі двухбаковага супрацоўніцтва, уключаючы развіццё лічбавых механізмаў пракурорскага нагляду, сумеснае рэагаванне на трансгранічныя пагрозы ў эканоміцы і далейшае ўмацаванне прававой абароны бізнесу.

Фота: Генеральная пракуратура Расійскай Федэрацыі

Упраўленне ўзаемадзеяння са СМІ
Генеральнай пракуратуры