Генеральны пракурор Андрэй Швед узнагародзіў пераможцаў нацыянальнага этапу Міжнароднага маладзёжнага конкурсу "Разам супраць карупцыі!"

18.03.2025

Генеральны пракурор Рэспублікі Беларусь Андрэй Швед прыняў удзел ва ўрачыстай цырымоніі ўзнагароджання пераможцаў нацыянальнага этапа Міжнароднага маладзёжнага конкурсу сацыяльнай антыкарупцыйнай рэкламы "Разам супраць карупцыі!" (далей - конкурс).

Даведачна. Генеральная пракуратура чацвёрты раз выступіла суарганізатарам конкурсу сацыяльнай антыкарупцыйнай рэкламы ў Рэспубліцы Беларусь. Конкурс праводзіцца пад эгідай Міждзяржаўнага савета па процідзеянні карупцыі - органа галіновага супрацоўніцтва дзяржаў - удзельніц СНД.

Канкурсанты - маладыя людзі ва ўзросце ад 10 да 25 гадоў з больш чым 30 краін, у тым ліку Беларусі, Расіі, Казахстана, Таджыкістана, Аўстрыі, Аргенціны, Індыі, В'етнама, Аўстраліі, Японіі і многіх іншых.

Аўтары работ спаборнічалі ў трох намінацыях: "Лепшы відэаролік", "Лепшы плакат" і "Лепшы малюнак".

Характэрна актыўнасць беларускіх удзельнікаў - на нацыянальны этап конкурсу паступіла звыш 2,5 тысячы праектаў.



Звяртаючыся з прывітальным словам да маладых людзей, Генеральны пракурор Рэспублікі Беларусь падкрэсліў: «Карупцыя - выклік глабальнага, міжнароднага характару. Чаму важна змагацца з карупцыяй, аб гэтым вы сказалі і паказалі ў сваіх конкурсных работах. Разглядаць карупцыю варта як прамую пагрозу нацыянальнай бяспецы, бо яна здольная разбурыць сацыяльную і эканамічную сістэмы любой дзяржавы. Такія глабальныя трагедыі, як вайна і іншыя сацыяльныя ўзрушэнні, пачынаюцца з разлажэння грамадства, подкупу службовых асоб. Фактычна ўсё пачынаецца з карупцыі, нажывы, калі інтарэсы дзяржавы і простых грамадзянаў засланяюцца асабістымі інтарэсамі асобных людзей».



Пры гэтым Андрэй Швед указаў на неабходнасць уцягвання ў антыкарупцыйную дзейнасць грамадскасці, асабліва маладога пакалення: «Важна, што вы разумееце, што праблема супрацьдзеяння карупцыі закранае інтарэсы кожнага з нас. З часам ваша работа ў рамках падрыхтоўкі сацыяльнай антыкарупцыйнай рэкламы дасць свае вынікі. Для нас каштоўна тое, што вы ўбачылі і па-свойму паказалі дадзеную праблему ў творчых працах».



У намінацыі "Лепшы відэаролік" пераможцамі нацыянальнага этапу сталі:

• творчы калектыў ДУА «Калодзішчанская сярэдняя школа №2», чыя праца на міжнародным узроўні ўдастоена II месца;
• творчы калектыў ДУА "Мінскі гарадскі адукацыйна-аздараўленчы цэнтр "Лідэр", відэаролік якога на міжнародным этапе ў сваёй узроставай катэгорыі заняў I месца;
• калектыў УАЗ "40-я гарадская клінічная паліклініка г.Мінска".

У намінацыі "Лепшы малюнак" узнагарод удастоены:

•  Лілія Мацвяйчук, навучэнка ДУА «Сярэдняя школа №22 г.Брэста», чый малюнак заняў ІІ месца на міжнародным этапе;
•  Кірыл Седлоўскі, студэнт Віцебскага дзяржаўнага тэхналагічнага ўніверсітэта, – яго працы міжнароднае журы прысудзіла II прызавое месца ў гэтай намінацыі;
•  Анастасія Лабанава, малады спецыяліст УП «Баранавічыгаз», - яе малюнак стаў пераможцам і на міжнародным этапе.

У намінацыі "Лепшы плакат" прызамі адзначаны:

• Аляксей Казубоўскі, навучэнец ДУА «Сярэдняя школа №2 р.п.Рэчыца» (Столінскі раён);
• Лізавета Картавенкава, студэнтка Віцебскага дзяржаўнага ўніверсітэта імя П.М.Машэрава;
• Дзяніс Гайкевіч, вядучы спецыяліст ДВА "Мінскбуд", чый плакат па заслугах ацэнены міжнародным журы і атрымаў III месца ў сваёй намінацыі.

У завяршэнні мерапрыемства кіраўнік нагляднага ведамства яшчэ раз падзякаваў канкурсантам і выказаў упэўненасць у тым, што "ўдзел і перамога ў гэтым унікальным праекце прынясуць ім не толькі прыемныя эмоцыі, але і дапамогуць сфарміраваць уласную ўнутраную пазіцыю, стрыжань, нецярпімасць да ўсякіх праяў карупцыі".

Пасля ўрачыстай часткі пераможцы нацыянальнага этапа наведалі Беларускі дзяржаўны музей гісторыі Вялікай Айчыннай вайны, дзе сярод іншага азнаёміліся з нядаўна адкрытай экспазіцыяй, прысвечанай генацыду беларускага народа.

Фота: Генеральная пракуратура

Упраўленне ўзаемадзеяння са СМІ
Генеральнай пракуратуры