Барацьба з кіберзлачыннасцю: у Генеральнай пракуратуры адбылася міжведамасная нарада

Пад старшынствам Генеральнага пракурора Рэспублікі Беларусь Дзмітрыя Горы ў Генеральнай пракуратуры адбылася міжведамасная нарада па тэме: «Стан кіберзлачыннасці і крыміналагічны прагноз яе дынамікі. Праблемныя пытанні супрацьдзеяння злачынствам, якія здзяйсняюцца з выкарыстаннем інфармацыйна-камунікацыйных тэхналогій».





У мерапрыемстве прынялі ўдзел Старшыня Праўлення Нацыянальнага банка Рэспублікі Беларусь Раман Галоўчанка і яго намеснік Андрэй Картун, Старшыня Следчага камітэта Рэспублікі Беларусь Канстанцін Бычак і яго намеснік Алег Шандаровіч, начальнік Аператыўна-аналітычнага цэнтра пры Прэзідэнце Рэспублікі Беларусь Андрэй Паўлючэнка, намеснік Міністра ўнутраных спраў Рэспублікі Беларусь – начальнік крымінальнай міліцыі Генадзь Казакевіч, Міністр сувязі і інфарматызацыі Рэспублікі Беларусь Кірыл Залескі, дырэктар Дэпартамента фінансавага маніторынгу КДК Дзмітрый Захараў, дырэктар Навукова-практычнага цэнтра Генеральнай пракуратуры Ігар Мароз, а таксама іншыя службовыя асобы міністэрстваў і ведамстваў.







Звяртаючыся да ўдзельнікаў нарады, Генеральны пракурор Рэспублікі Беларусь нагадаў, што ў адпаведнасці з Канцэпцыяй нацыянальнай бяспекі рост колькасці злачынстваў і іншых правапарушэнняў з выкарыстаннем інфармацыйна-камунікацыйных тэхналогій – адна з асноўных пагроз нацыянальнай бяспецы.

Даведачна. У 2025 годзе колькасць кіберзлачынстваў знізілася з 20137 да 18977, або на 5,8%. У той жа час іх удзельная вага ў агульнай структуры злачыннасці павялічылася на 2,2 працэнта і склала 29,7 працэнта. У 2024 годзе ад кіберзлачынстваў пацярпела звыш 21 тыс. грамадзян, а ў 2025-м іх колькасць узрасла і перавысіла 22 тыс. чалавек. Урон па крымінальных справах перавысіў 80 млн рублёў (у 2024 годзе – 78 млн рублёў). Па выніках студзеня-лютага 2026 года колькасць кіберзлачынстваў павялічылася на 22% – з 2579 да 3146.

Удзельнікі мерапрыемства, якія выступалі з дакладамі, звярнулі ўвагу на актуальнасць кіберкрадзяжоў шляхам вішынгу і фішынгу, а таксама крэдытных сродкаў, выдадзеных грамадзянам, якія знаходзіліся пад уплывам зламыснікаў.

У ходзе міжведамаснай нарады адным з важных напрамкаў барацьбы з кіберзлачыннасцю вызначана процідзеянне развіццю інфраструктуры, звязанай з незаконным абаротам плацежных інструментаў, сродкаў плацяжу і іх рэквізітаў.

Адзначана, што існуючая практыка выдачы грамадзянам банкаўскіх плацежных карт спрыяе іх выкарыстанню ў злачынных мэтах, пры гэтым актуальная праблематыка атрымання наяўных выкрадзеных грошай з дапамогай такіх карт, у тым ліку такенізаваных, а таксама з прымяненнем тэхналогіі NFC як у Беларусі, так і за мяжой.

«У цяперашні час назіраецца ўстойлівая тэндэнцыя значнага ўцягвання ў супрацьпраўную дзейнасць беларускіх крыптакампаній і віртуальных ігральных устаноў. Мы фіксуем факты вываду выкрадзеных сродкаў праз іх пераводы замежным ігральным установам і казіно», – канстатаваў Генеральны пракурор Рэспублікі Беларусь.

У рамках мерапрыемства кіраўнік нагляднага ведамства таксама адказаў на пытанні журналістаў, праінфармаваў аб далейшых мерах па супрацьдзеянні кіберзлачыннасці.

«Эфектыўная барацьба з гэтым відам злачынстваў магчыма толькі пры скаардынаванай рабоце праваахоўнага блока, а таксама іншых дзяржаўных органаў і арганізацый, у тым ліку прыватнай формы ўласнасці, напрыклад Нацыянальнага банка, камерцыйных банкаў, Міністэрства сувязі і інфарматызацыі, аператараў электрасувязі», – сказаў ён.

Па выніках нарады выпрацаваны комплекс канкрэтных дадатковых арганізацыйна-практычных мер, якія павінны павысіць эфектыўнасць барацьбы з кіберзлачыннасцю, у тым ліку праз удасканаленне нарматыўна-прававых актаў.

Фота: Генеральная пракуратура, sb.by, belta.by

Упраўленне ўзаемадзеяння са СМІ
Генеральнай пракуратуры